اسلام آباد۔30مارچ (اے پی پی):وفاقی وزیر داخلہ رانا ثنا اللہ خان آکھیے قانون سازی کرݨ پارلیمان دا اختیار اے ایں کیتے کہیں توں اجازت درکار کائنی ہوندی ، ہݨ معاملات کوں حل کرݨ کیتے گریٹر ڈائیلاگ دی لوڑھ اے جیں اچ حکومت ،اپوزیشن، اسٹیبلشمنٹ اتے عدلیہ رل تے میثاق جمہوریت ، امن اتے معیشت کیتے ڳالھ کرن ایں دے بعد ملک ترقی ،معیشت بہتری اتے لوکاں دی مشکلات حل تھی سڳدن ۔ او خمیس کوں سپریم کورٹ دے ٻاہروں صحافیاں نال ڳالھ مہاڑ کریندے پئے ہن ۔ وفاقی وزیر داخلہ رانا ثنا اللہ خان آکھیے ملک ایں ویلھے افراتفری اتے انارکی دے دہانے تے کھڑے ،ایں کیتے عمران خان 10 سال محنت کیتی اے ، جݙاں حکومت اچ رہیے تاں ملک دی معیشت دا بھٹہ ٻلھا ݙتا ۔ انہاں آکھیے ہݨ معاملات کوں حل کرݨ کیتے گریٹرڈیبٹ تے ڈائیلاگ دی لوڑھ اے جیں اچ حکومت اتے اپوزیشن دی ساریاں جماعتاں رل ٻہہ تے چارٹر آف ڈیموکریسی ، معیشت اتے امن ہووے ایں توں ملک دی بہتری آلے پاسے تے مشکلات توں نکل سڳدے تے ملک دا سیاسی ٹمپریچر گھٹ تھی سڳدے ۔ انہاں آکھیے چیف جسٹس سپریم کورٹ اتے معزز بینچ دی رائے دی قدر کریندوں ایں کیتے او لائحہ اختیار کرݨا چاہیدے جیں توں ملک اچ بہتری آسڳے ، دہشت گردی قابو توں ٻاہر نی تھئی ساݙٰ مسلح افواج اچ صلاحیت اے جو او دہشت گرداں دے عزائم کوں ناکام بݨاون ایں کیتے او جاناں دیاں قربانیاں ݙیندے پئن ایں ویلھے ملک دا ھک انچ وی ایجھا کائنی جتھاں ریاست دی رٹ برقرار نہ ہووے ۔
