اسلام آباد۔12اگست (اے پی پی):وزیراعظم شہباز شریف آکھیے جو پاکستان تے ترکی وچال تجارت تے سرمایہ کاری ودھاوݨ دے ٻہوں سارے موقع موجود ہن ، مصنوعات دی تجارت دے معاہدے توں ݙوہیں ملکاں کیتے نویں رستے کھلسن ،ݙوطرفہ تجارت دے ودھارے کیتے معاہدے تے پوری طرح عمل درآمد کوں یقینی بݨایا ویسی ، اے ڳالھ انہاں جمعے کوں اتھاں پاکستان تے ترکی وچال تجارتی معاہدے تے دستخطاں دی تقریب توں خطاب کریندے ہوئیں آکھی اے ۔معاہدے تے وفاقی وزیر تجارت سیدنوید قمر تے ترکی دے وزیرتجارت مہمت مش دستخط کیتے ۔ تقریب اچ وفاقی وزیر خزانہ مفتاح اسماعیل ، وفاقی وزیر اطلاعات و نشریات مریم اورنگزیب ، وفاقی وزیر ماحولیاتی تبدیلی شیری رحمن، وفاقی وزیر سرمایہ کاری بورڈ چوہدر ی سالک حسین اتے اعلیٰ سرکاری افسران وی موجود ہن۔ وزیراعظم آکھیے پاکستان تے ترکی دے تاریخی برادرانہ تعلقات اچ اے معاہدہ سنگ میل دی حیثیت رکھیندے۔ ݙینھاں اچ ملکاں وچال تجارتی معاہدہ ٻہوں چنڳٰی ڳالھ اے ایں تے کئی سالاں توں ڳالھ مہاڑ تھیندی پئی اے ، مئی اچ ساݙے ترکی دے دورے دے بعد پاکستان تے ترکی دے طرفوں معاہدے کیتے کوششاں کوں تکھا کیتا ڳیا ۔ ترکی دےصدر رجب طیب اردوان دی مثالی قیادت اچ ترکی دے وزیر تجارت مہمت مش اتے پاکستان دے وزیرتجارت سید نوید قمر تے ݙوہیں ملکاں دے سفیراں تے ٻئے حکام ٻہوں محنت کیتی جیں دے بعد اے معاہدہ طے پاتے۔ انہاں آکھیے جو پاکستان تے ترکی وچال تجارت دے ودھارے دی ٻہوں ساری گنجائش اتے صلاحیت موجود اے تے تجارت دے ودھارے کیتے اساں بھرپور عزم رکھیندوں ۔ ایں معاہدے توں ݙوہیں ملکاں دے تعلقات کوں مستحکم بݨاوݨ کیتے نویں رستے کھلسن تے تجارت و سرمایہ کاری ودھاوݨ اچ مدد ل ویسی ، اساکوں ایں معاہدے تے پوری طرح عمل درآمد کوں یقینی بݨاوݨاں اے ۔ تقریب توں خطاب کریندے ہوئیں وزیرتجارت سیدنوید قمر آکھیے جو پاکستان تے ترکی وچال معاہدے دے تحت ݙوہیں ملک آپݨی آپݨی مصنوعات دی تجارت کرسڳسن تے ایں تں ݙوہیں ملکاں دی معیشت مستحکم تھیسی ۔
