اسلام آباد۔15مارچ (اے پی پی):وفاقی وزیر اطلاعات و نشریات مریم اورنگزیب آکھیے حکومت دا عمران خان دی گرفتاری نال کوئی تعلق کائنی ، عدالت پولیس کوں عمران خان دے وارنٹ گرفتاری جاری کیتے، پولیس عدالتی احکامات تے عمل کریندی پئی اے ،دہشت گرد جتھے ریاستی اداریں تے حملہ آور ہن ، سیاسی جماعت دا لیڈر تریمتاں تے ٻالاں کوں ڈھال بݨا تے لکدا نی بلکہ بلکہ سینا تان تے گرفتاری ݙیندے۔ میڈیا نال ڳالھ مہاڑ کریندے ہوئیں انہاں آکھیے پاکستان دی عوام پچھلے کجھ مہینے توں ھک تماشا ݙیکھدی پئی اے جو ھک بزدل، فارن ایجنٹ، توشہ خانہ چور، گھڑی چور، ٹیرین دا والد تے توہین عدالت دا مجرم پولیس توں بھڄدا پئے ، اے بندہ آکھدے جو میں معذور اتے بزرگ ہاں، میݙی لت تے پلستر اتے میݙی جان کوں خطرہ اے۔ ݙو جھنڈیں دے درمیان ٻہہ تے کوڑ مریندے تے آکھدے جو او تحریک کیتے تیار تے عدالت ونڄݨ کیتے بیمار اے ۔ اے منافق، بزدل اتے کوڑا بندہ اے جیڑھا پاکستان اچ خانہ جنگی، سول وار اتے افراتفری چاہندے تے تاثر ݙیوݨ دی کوشش کریندا پئے جو حکومت ایںکوں گرفتار کریندی پئی اے ۔ انہاں واضح کیتے جو حکومت دا عمران خان دی گرفتاری نال کوئی تعلق کائنی ، جے حکومت گرفتار کرݨا ہوندا تاں ریاستی طاقت وی موجود ہئی، اختیار وی موجود ہئی تے جیڑھا کجھ عمران خان پچھلے چار سال اپݨے سیاسی مخالفین کوں جیل اچ سٹ تے استعمال کیتا ، انہاں آکھیے اے بندہ صرف تے صرف ٻالاں تے تریمتاں دے مورچے اچ لکیا ٻیٹھے تے انسانی مورچے کوں استعمال کریندا پئے۔
