کراچی۔26جولائی(اے پی پی):وزیرِ اعظم محمد شہباز شریف آکھیے جو حکومت سرمایہ کاری دی سہولت اتے کاروبار دوست پالیسیاں نال ملکی معیشت دی بحالی کیتے ردھی ہوئی اے، معاشی بحالی، بین الاقوامی شراکت داراں، سرمایہ کاراں اتے کاروباری برادری دے اعتماد کوں بحال کرݨ دا موقع نا ونڄیڄݨ ݙیسوں۔ اے ڳالھ انہاں چیئرمین پاکستان بزنس کونسل محمد اورنگزیب دی اڳواݨی اچ پی بی سی دے وفد نال ملݨ ویلھے آکھی۔ وزیراعظم آکھیا جو اڄوکی حکومت دی بہترین پالیسی پاروں ملک دے ݙیوالہ تھیوݨ دا خطرہ ٹلیے، اے اتحادی حکومت دی ہر جماعت دی کامیابی اے ڄئین اوکھے فیصلے اچ ہتھ ونݙائے، اڄ الحمدللہ پاکستان دی معیشت ترقی کرݨ لڳ ڳئی اے، پاکستان اچ براہ راست بیرونی سرمایہ کاری کیتے خصوصی سرمایہ کاری سہولت کونسل ٻݨݨ حوصلہ افزا اے۔ وفد ملکی معیشت دی بحالی، سرمایہ کار و کاروبار دوست سہولتاں ݙیوݨ تے حکومت دی تعریف کیتی۔ وزیراعظم یقین ݙیوایا جو ملک اچ تجارت و سرمایہ کاری، کاروبار دی ترقی، روزگار دے مواقع، سماجی و اقتصادی ترقی سانڳے کاروباری برادری دیاں تجویزاں کوں اڳونہا رکھسی۔ ملاقات اچ وفاقی وزراء مریم اورنگزیب، انجینئر خرم دستگیر، وزیر مملکت برائے پٹرولیم ڈاکٹر مصدق ملک، گورنر سندھ کامران خان ٹیسوری، گورنر سٹیٹ بینک، وزیراعلیٰ سندھ سید مراد علی شاہ، اراکین پارلیمنٹ اتے متعلقہ اعلی حکام وی موجود ہن۔
