اسلام آباد۔5جولائی (اے پی پی):چیف جسٹس سپریم کورٹ جسٹس عمرعطا بندیال دی سربراہی اچ ترائے رکنی بنچ پی ٹی آئی دے پنجاب اسمبلی دے منحرف ارکان دے وکلاء کوں پارٹی پالیسی دے خلاف ووٹ ݙیوݨ دے نکتے تے پکے دلائل ݙیوݨ دی ہدایت کیتی اے ، فاضل عدالت قرارݙتے جو منحرف ارکان دے معاملے دی انفرادی طور تے سماعت کیتی ویسی ، عدالت سماعت غیر معینہ مدت کیتے ملتوی کرݙتی ۔چیف جسٹس سپریم کورٹ جسٹس عمر عطابندیال دی سربراہی اچ جسٹس امین الدین خان تے جسٹس محمد علی مظہر تے مشتمل ترائے رکنی بنچ منڳل کوں پی ٹی آئی دے پنجاب اسمبلی دے منحرف ارکان دیاں اپیلاں تے باقاعدہ سماعت کیتی ۔ چیف جسٹس سپریم کورٹ جسٹس عمر عطا بندیال سماعت ویلھے آپݨے ریمارکس اچ آکھیے سپریم کورٹ آئین دے آرٹیکل 63 اے دی تشریح اچ پہلے ہی انحراف کوں ناسور قرار ݙے چکی اے، انحراف معمولی ڳالھ کائنی اے انسان دے ضمیر دا معاملہ اے، عدالت واضح کر چکی اے جو منحرف ارکان دا ووٹ شمار نہ تھیسی ۔چیف جسٹس آکھیے سیاسی جماعتاں دا بنیادی حق اے جو انہاں دے ارکان انہاں دے نال وفاداری کرن، سیاسی جماعت دا سربراہ تےپارلیمانی پارٹی لیڈر انڄ انڄ ہوندن ، ارکان کوں پارٹی پالیسی دے حوالے نال پارلیمانی پارٹی لیڈردی ہدایت تے عمل کرݨا ہوندے ۔ پی ٹی آئی پنجاب اسمبلی دے منحرف ارکان دے وکیل اپݨے دلائل ݙیندے ہوئیں آکھیے جو پی ٹی آئی وزیراعلی پنجاب دے انتخاب کیتے کوئی ہدایات جاری نہ کیتیاں ہن ،پی ٹی آئی دے وزیراعلی دے امیدوار پرویز الہی انتخاب دے ݙینھ اجلاس دا بائیکاٹ کرݙتا ہئی ۔جیں تے چیف جسٹس عمر عطا بندیال آکھیے جݙاں تساݙی جماعت اجلاس دا بائیکاٹ کیتا تاں تساں شرکت کیوں کیتی ؟جسٹس محمد علی مظہر آکھیے پی ٹی آئی دے ممبر ہوندے ہوئیں تساں مسلم لیگ ن کوں ووٹ ݙتن ۔فاضل عدالت منحرف ارکان کوں پارٹی پالیسی دے خلاف مسلم لیگ ن کوں ووٹ ݙیوݨ دے نکتے تے تیاری کر تے آوݨ دا حکم ݙیندے ہوئیں کیس دی سماعت غیر معینہ مدت ککیتے ملتوی کرݙتی ۔
.jpg)
