لاہور۔10اگست (اے پی پی) صدر مملکت ڈاکٹرعارف علوی آکھیا جو ٻہوں تکھے ترقی کریندی دنیا دا مقابلہ کرݨ کیتے پاکستان اچ مصنوعی ذہانت کوں ودھاوݨ دی لوڑھ اے، جدید تعلیم تے تربیت ݙیوݨ ٻہوں ضروری اے۔ تعلیم دے بغیر ترقی دا پندھ ممکن کائنی، جدید ٹیکنالوجی توں فیدہ چاوݨ کیتے زیرک قیادت دی لوڑھ اے۔ اے ڳالھیں انہاں خمیس کوں مقامی ہوٹل اچ صحت دے شعبے اچ مصنوعی ذہانت اتے مشین لرننگ دے استعمال بارے کانفرنس’’انسٹا کیئر فیوچر ہیلتھ فورم‘‘ توں خطاب کریندیں ہوئیں آکھی۔ ایں موقع تے خاتون اول بیگم ثمینہ علوی ، نگران صوبائی وزیرصحت تے سوشل ویلفیئر پروفیسر ڈاکٹر جاوید اکرم،سی ای او انسٹا کیئر فیوچر ہیلتھ فورم بلال امجد اتے شعبہ صحت دے ماہرین موجود ہن۔ صدرمملکت آکھیا جو ہمسایہ ملکاں اچ شرح خواندگی سو فیصد اے، ان پڑھ لوکاں کوں معاشرے اتے ملک کیتے کارآمد ٻݨاوݨا پوسی۔ پاکستان دے نینگراں اچ صلاحیت دی ڳھٹکی کائنی۔ صدر مملکت امید کیتی جو پاکستان دا مستقبل روشن اے۔ تعلیم بارے صدرمملکت آکھیا جو پاکستان علم دے میدان اچ خطے دے ٻئے ملکاں توں پچھوں اے۔ ݙو کروڑ ستر لکھ ٻال سکول توں ٻاہر ہن جڈانجو بھارت، بنگلہ دیش اتے سری لنکا اچ سکول ونجݨ آلے ٻالاں دا تناسب پاکستان توں ودھ اے۔ کانفرنس دے چھیکڑ تے صدرمملکت چنڳی کارکردگی آلیاں اچ ایوارڈ تقسیم کیتے۔ ایوارڈ ڳھنݨ آلیاں اچ ڈاکٹر یاسر نیازی ،ڈاکٹر عمر چغتائی ،امبر بشیر ،تیمور ضیا،خورشید انور ،ڈاکٹر ابصارعا رف ،بلال امجد،محمد احمد ،عائشہ صدیق،ڈاکٹر شہلا جاوید ،وقاص الحسن ،ڈاکٹر عاطف الرحمن اتے ٻئے شامل ہن۔
.jpg)
.jpg)