اسلام آباد۔6ستمبر (اے پی پی) وزیراعظم شہبازشریف دی خصوصی ہدایت تے چھل دے علاقیاں اچ بجلی دی بحالی دا کم ہنگامی بنیاداں تے جاری اے۔ مٹہ سوات ٹرانسمیشن لائن دے سیلاب توں لنگھݨ آلے 2 ٹاورز کوں ولا چلا ݙتا ڳئے۔ پشاور الیکٹرک سپلائی کمپنی دا 132 کے وی مٹہ گرڈ اسٹیشن چلݨ نال سوات دے ہک وݙے حصے دی بجلی دی سپلائی بحال کر ݙتی ڳئی اے۔ ٹرائبل ایریاز الیکٹرک سپلائی کمپنی ٹانک جنڈولہ سپلائی لائن بحال کرݙتی اے۔ منگل کوں وزیراعظم آفس دے میڈیا ونگ توں جاری بیان موجب تیمر گرہ باجوڑ لائنز بحال تھیوݨ نال منڈا اتے باجوڑ گرڈز توں بجلی دی فراہمی شروع تھی ڳئی اے۔ مدین گرڈ اسٹیشن تے بحالی دا کم جاری اے۔ 66 کے وی دا گڑھی خیرو گرڈ سٹیشن فعال تھیوݨ نال جیکب آباد دے وݙے حصے کوں بجلی دی فراہمی بحال تھی ڳئی اے۔ وزیر اعظم شہباز شریف بجلی دی سپلائی دی بحالی دے عمل کوں خود مانیٹر کریندے پئن۔ ایں بارے انہاں کوں ہر ݙینھ رپورٹ پیش کیتی ویندی پئی اے۔
.jpg)
