اسلام آباد۔21ستمبر(اے پی پی) نگران وفاقی وزیرخزانہ ومحصولات شمشاد اختر آکھیے سرکاری کاروباری اداریں (ایس اوایز) دی نجکاری اتے انہاں کوں منافع بخش بݨاوݨ کیتے دانش مندانہ پالیسی اقدامات داسلسلہ جاری اے، سارے شراکت داراں دی مشاورت نال پالیسی سازی دا عمل اڳوں ودھیندے پیوں ، ایس اوایز دے حوالے نال مجوزہ پالیسی اچ بورڈ دے ممبران دا آزادانہ تقررکیتا ویسی ، بورڈ ممبران کوں آپݨے عہدے دی میعاد دی سیکیورٹی ݙتی ویسی، سی ای او دی تعیناتی اہم اے ، ایں تے نظرثانی کیتی ویسی ، حکومتی ملکیتی اداریں اچ کہیں قسم دی مداخلت نہ کیتی ویسی ، انہاں اداریں دی نویں سروں تنظیم کیتی ویندی پئی اے ۔ میڈیا کوں بریفنگ ݙیندے ہوئیں انہاں آکھیے سرکاری کاروباری اداریں دا ملکی ترقی اچ اہم اتےتاریخی کرداررہیے، ایجھے شعبہ جات جتھاں نجی شعبہ ہچکچاہٹ داشکار ہئی اتھاں ایس اوایز خدمات ݙتی اے، ایں ویلھے مالیاتی ایس اوایز دی تعداد18، انڈسٹرئیل اینڈ ایسٹیٹ ڈولپمنٹ اینڈ منیجمنٹ 4 ، بنیادی ڈھانچہ ، ٹرانسپورٹ اتے آئی ٹی سی اچ 12، مینوفیچرنگ، کان کنی وانجنئیرنگ 14، تیل وگیس 8، پاور20 تے ٹریڈنگ ومارکیٹینگ دے شعبہ اچ 4 ایس اوایز ہن۔مالی سال 2019 اچ سارے ایس اوایز دے مجموعی محاصل داحجم تقریباً 4 ٹریلین روپے جݙاں جو انہاں دے اثاثہ جات دی بک ویلیو19 ٹریلین روپے ہئی ۔اے ایس اوایز 4 لکھ 50 ہزار ملازماں کوں روزگارݙیندے پئن ۔انہاں آکھیے اے وی حقیقت اے جو ویلھے دے نال نال ایس اوایز دی کارگردگی گھٹ تھیندی ڳئی ۔ سال 2019 اچ کمرشل ایس ای ایز دا گھاٹا 143 ارب روپے رہیا ، 2020 اچ حکومتی ملکیتی اداریں دے ضیان 500 ارب روپے سالانہ تئیں پڄ ڳئے ہن ۔انہاں آکھیے معیشت دی بحالی کیتے اقدامات دا سلسلہ جاری اے تے منافع بخش کمپنیاں دی حوصلہ افزائی کیتی ویندی پئی اے ۔مالیاتی ضیان دے ازالے کیتے وزارت خزانہ مدد کریندی پئی اے ۔حکومت کئی ایس اوایز کوں چنڳی حالت اچ رکھݨ دی کوشش کیتی اے ۔
