اسلام آباد۔18ستمبر(اے پی پی) وزیراعظم شہباز شریف اتے پاکستان مسلم لیگ (ن) دے قائد نواز شریف دی لندن اچ اہم ملاقات تھئی۔ ملاقات اچ سابق وزیر خزانہ اسحٰق ڈار، وزیراعظم دے پتر سلمان شہباز وی موجود ہن۔ انہاں ملکی سیاسی صورتحال، معاشی چیلنجز نال نٻݨݨ کیتے اقدامات سودھا سیلاب توں بعد پیدا تھیوݨ آلے حالات تے الایا۔ وزیراعظم اتحادی جماعتاں نال سیاسی معاملات دا وی ݙسایا۔ انہاں ودھدے مہانگ تے قابو پاوݨ اتے سیلاب زدہ علاقیاں دی فوری بحالی تے ساری توجہ ݙیوݨ تے اتفاق کیتے۔ وزیراعظم شہباز شریف آکھیا جو حکومت دی ساری توجہ سیلاب متاثرین دی بحالی اتے معیشت کوں تکڑا کرݨ تے ہے، ایں سانڳے اوکھے فیصلے کرݨے پوندے پن ٻھل اساں تیکھے اوکھ اچوں نکل آسوں۔ بعد اچ میڈیا نال الیندے وزیراعظم شہباز شریف آکھیا جو پاکستان دے عوام وی سیلاب متاثرین کیتے ودھ تے عطیات ݙیندے پن، دوست ملک وی ودھ چڑھ تے ہتھ ونݙیندے پن ڄݙاں جو افواج پاکستان ݙینھ رات سیلاب متاثرین دی مدد کیتے ردھے ہوئن، ایں سانڳے وفاقی و صوبائی حکومتاں اپݨا فرض نٻھیسن۔ انہاں آکھیا جو سیلاب متاثرین دی امداد و بحالی کیتے این ڈی ایم اے ساریاں متعلقہ حکومتاں نال رل تے کم کریندی پئی اے، سیلاب متاثرین کیتے ہر ٹٻر کوں 25 ہزار روپے مالی معاونت دے حساب نال 30 ارب روپے ونݙیندے پئے ہیں، کوشش اے جو سیلاب متاثرین دی بحالی تیکھے مکمل تھیوے۔
