دوحہ۔15ستمبر (اے پی پی) وزیراعظم محمد شہباز شریف ہک ݙینھ دے سرکاری دورے تے قطر دے دارالحکومت دوحہ پڄ ڳئین۔ دوحہ ایئرپورٹ تے قطر دے وزیر ثقافت شیخ عبدالرحمن بن حمد بن جاسم بن حمد الثانی وزیراعظم تے پاکستانی وفد دا استقبال کیتا۔ پراویزی وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف دوحہ اچ تھیوݨ آلی ہنگامی عرب اسلامی سربراہی کانفرنس اچ شرکت کیتے پڄئین۔ اے سربراہی اجلاس دوحہ اچ اسرائیل دے فضائی حملیاں تے فلسطین اچ انسانی حقوق دی پامالی دی مسلسل ٻݨدی ہوئی صورتحال تے غور کرݨ کیتے سݙیا ڳئے۔ نائب وزیراعظم تے وزیر خارجہ محمد اسحاق ڈار، وزیر دفاع خواجہ محمد آصف، وفاقی وزیر اطلاعات تے نشریات عطا اللہ تارڑ تے معاون خصوصی سید طارق فاطمی وزیراعظم دے نال اعلیٰ سطحی وفد اچ شامل ہن۔ بیان دے مطابق پاکستان قطر دے نال آپݨے تعلقات کوں انتہائی اہمیت ݙیندے تے قطر تے ٻئے علاقائی ریاستاں دے خلاف اسرائیلی جارحیت دی شدید مذمت کریندے۔ قطر دے نال اظہار یکجہتی تے علاقائی اتحاد کیتے وزیراعظم محمد شہباز شریف 11 ستمبر 2025 کوں دوحہ دا دورہ کیتا ہئی تے قطر دی سلامتی تے خودمختاری کیتے پاکستان دی غیر متزلزل حمایت تے مشرق وسطیٰ اچ امن تے استحکام کیتے آپݨے عزم دا اظہار کرݨ کیتے قطری قیادت نال ملاقات کیتی ہئی۔ 15 ستمبر کوں دوحہ اچ تھیوݨ آلے ہنگامی اجلاس اچ وزیراعظم پاکستان تے ٻئے مسلمان ممالک دے سربراہان دی شرکت امت مسلمہ اچ مضبوط اتحاد تے علاقائی امن قائم کرݨ دے غیر متزلزل عزم دی علامت اے۔
